وبائيه الخفافيش

03 مايو 2020
وبائيه الخفافيش

COVID -19 , SARS , MERS

دول 3 امراض انتشرو في السنين الاخيره ... تفتكر ايه الرابط مابينهم او ايه المشترك مابينهم ؟
المشترك ما بينهم هو حيوان الخفاش bats و انهم جميهم عترات او فصايل من فيروس الكورونا.

مربط الفرس هنا هو حيوان الخفاش .. طب اشمعني الخفاش هو سبب المشاكل و سبب انتشار الفيروسات دي كلها ؟

السبب هو ان الخفاش بيحتوي علي جهاز مناعه غريب جدا و مختلف عن اي جهاز مناعه تاني من ناحيه مقاومته للفيروس.

تعالو نعرف شويه معلومات عن الخفاش :

  • عمره بيصل ل 30-40 سنه و ده يرجع الي قوه جهازها المناعي
  • الخفاش من الحيوانات الثديه و لكنه الوحيد الي بيطير وده بيخليه محتاج يعمل مجهود كبير عشان يولد طاقه عشان يستخدمها في الطيران.
  • جهاز المناعه بتاع الخفاش من النوع الي مكبر دماغه ... ازاي يعني مكبر دماغه ؟
    يعني جهاز المناعه فالعادي اما بيهاجمه فيروس بيبدأ يحصل التهابات و ترتفع حراره الجسم و يحصل حاله طوارئ في الجسم و كل الطاقه تتوجه لجهاز المناعه لمحاربه الفيروس ده (دي الاستراتيجيه العاديه).
    لكن فالخفاش جهاز المناعه بيكبر دماغه و بيعمل معاهده سلام بينه وبين الفيروس و بيقوله خش يا باشا براحتك اكلك و شربك موجود بس ماتأذينيش .
  • و المعلومه دي مفاجأه .. جسم الخفاش عدو جامد للالتهاب و ده لان الجينات بتاعته فيها نقص في كتير من الجينات المسؤوله عن تكوين متوسطات الالتهاب inflammatory mediators و ده من اهم الاسباب الي خلت الخفاش بيئه خصبه للكثير من الامراض بدون ما تظهر عليه اعراض (في معظم الامراض لكن مرض زي السعار اما بيتمكن منه بيعمل اعراض عادي جدا).

 

الخلاصه هنا هي ان الخفاش عنده جهاز مناعه صاحي جدا لا و ده كمان اكثر حيوان ثدي بيفرز انترفيرون و لكن تركيزه بيكون انه يمنع ظهور اعراض للمرض او حتي يحد من انتشاره.
لا ده كمان فكره انه يقضي علي الفيروس مش فدماغه اصلا بالعكس هو عباره عن فندق للفيروس ياكل و يكبر و يعيش فيه و يطور من نفسه كمان لكن متجيش عليا ولا تعملي اي اعراض للمرض.

 

المحصله النهائيه : هي ان الخفاش بيئه حاضه RESERVOIR HOST لعدد مهول من الامراض و الفيروسات. ده مش وعاء حاضن بس لا ده كمان بيخلي الفيروسات تتكاثر و يحصل فيها طفرات جديده و يطور من نفسه باستمرار.

 

اخيرا :

- حدوث تواصل بين الانسان و الخفاش زي صاحبنا اللي اكل الخفاش و بالتالي الخفاش هنا بيقولك شكرا اتفضل ياباشا فيرس شرس متطور بيشتغل علي نفسه و بيطور نفسه و مستني اللحظة دي من سنين مبروك عليك احلي جائحة علي مستوي البشرية .

- و كمان لاحظ العلماء من خلال دراسه فيروسات كتيره ان فيروسات الخفافيش بتتنقل للانسان عن طريق وسيط حيواني زي ما حصل في السارس و اتنقل الفيروس من الخفافيش للانسان عن طريق حيوان قطط الزباد و زي ما حصل في الايبولا لما اتنقل للانسان عن طريق الشامبنزي او  الغوريلا و الميرس اتنقل للانسان عن طريق الجمال.
و مازال الجدل قائم لغايه دلوقتي لتحديد فيروس COVED19  الجديد اتنقل للانسان عن طريق اني حيوان .

 

المصادر

https://www.sciencealert.com/deadly-viruses-always-seem-to-start-off-with-bats-here-s-why-they-re-patient-zero

https://www.sciencedaily.com/releases/2019/02/190226112401.htm

https://www.syr-res.com/article/9512.html

مقالات ذات صلة